ACCOUNT ERSTELLEN

*

*

*

*

*

*

PASSWORT VERGESSEN?

*

M1 - A reachder Gaul

herren1Sodele, weil die ganze Seggl romgmotzt hend, dass se dr ledschde Bericht ed verstande hobet, kommt no a waidäged oifacher, wo au dr ledschde Grasdaggl bligga duad.
Am 17.11.2012 vo firdlneine bis halber zea hend oosre erschde Herra gega die Sempel voh Hegensberg-Liebersbronn gschpield!
 
Scho in dr Kabine hot der Dräner gseit, dass em a oisazwansg - zwansga reicha däd. No semmer nausgsaut und hobet des au grad so gmacht. Zerschd hemmer en jenseits Scheißdregg zammgschpield
, vor allem dr Ahgriff hot nix bacha kriegt. Koi oiner dubbeliger Ball isch bis vorne na komme - grad so als wärer mit Zweikomponende-Bäbb eigsaut. Hajo, wenn dr Bauer ed schwimma ko, isch d Badehos Schuld!
Ond no semmer hald au mit dreizea - achd end Paus ganga.
Abr en dr zweida Halbzeit hemmer d Abwähr uff 4:2 omgschdelld und no hemmer die Granadabachl gschwend wegbutzd, I sags eich. In ra Femfer-Reihe hemmer d Bälle neigsemmelt ond sen en nullkommanix bei dreizea - dreizea gwä. Nochher hemmer wiedr en reachdr Babb gschpield ond ällaweil d Chance ed gnutzd ond scho isch Hegensberg wieda mit achzea - fuffzea vorne gläga.
'Em Läba net!' hmmer deegt und wo dr Paggo neikomma isch hot er glei s zwansga - zwansga neiknalld. Wo dr Benni na no oine ausm Rückraum neighaue hot, semmers erschda mol vorne gläga.
Die Abwähr hot au gräftig Bälle ghalda und scho hodd' Konter-Maschee Hachtel wiedramol zuschlaga könna. In d'lädschde zea Minudde ischs Spiel na no waidäged fiddzelig gworda ond älle hend Nerva wie broade Nuudla braucht!
Z'ledschd hat dr Panzr dr Gegner no vollends duranand brocht ond hod sich oifach uff dr Ball gsetzt.
Am End hemmer nach obacha spannende ledschde Minudde mit zwoizwansg - femfezwansg nauszuus gwonna.
Ha, denged ihr, un wo isch jetzd no dr gaul na?
Dr Fuzzy hod scho vor drei Joahr beim grandiose Uffstieg gwisst: A reachder Gaul sprengt blos so hoch wie ner muas!
Sodele, I däd mi freie wenn ihr au beim nägschde Spiel am Vierezwanzigschde um Achde bei ohs dahoim im Goldäcker gega dr SKV Unterensinga Zwoi wieder dodabei send!
 

Unsere Online Sponsoren:

Allianz-Banner
Stierle
Brosig
TOP